کراچی میں جاری صفائی مہم میں بڑھ چڑھ کرحصہ لینے پر ایم کیوایم کے کارکنان زبردست خراج تحسین اورشاباش کے مستحق ہیں۔ الطاف حسین

لندن ۔۔۔ 15 مارچ 2016ء

متحدہ قومی موومنٹ کے قائدجناب الطاف حسین نے کہاہے کہ کراچی میں جاری صفائی مہم میں بڑھ چڑھ کرحصہ لینے پر ایم کیوایم کے کارکنان زبردست خراج تحسین اورشاباش کے مستحق ہیں۔ انہوں نے یہ بات صفائی مہم کے سلسلے میں آج ناظم آبادگلبہارٹاؤن کے کارکنوں اورہمدردوں سے فون پر خطاب کرتے ہوئے کہی۔جناب الطاف حسین نے کارکنوں سے کہاکہ آپ شہر کی صفائی ستھرائی کے کاموں میں لگے ہوئے ہیں اوردھول مٹی کچرے میں جاکر غلاظتیں اورگندگی صاف کررہے ہیں اورشہرکوکچرے سے صاف کرنے کی کوشش کررہے ہیں،حدیث نبویؐ ہے کہ صفائی نصف ایمان ہے اورآپ شہرکو صاف کرکے اس حدیث نبویؐ پر عمل کررہے ہیں،صفائی کایہ عمل ماحول کوصاف ستھرااور صحت مندبنانے کیلئے ایک بہترین کوشش ہے۔انہوں نے صفائی مہم میں حصہ لینے پرتمام کارکنوں، ماؤں بہنوں اوربزرگوں کوزبردست خراج تحسین پیش کیااورانہیں دعائیں دیں۔ انہوں نے ایم کیوایم کے ذمہ داروں کو تاکیدکی کہ صفائی مہم میں حصہ لینے والے کارکنوں اورماؤں بہنوں بزرگوں کے کھانے پینے کابھی بھرپورخیال رکھاجائے۔انہوں نے مخیرحضرات سے اپیل کی کہ وہ صفائی مہم میں حصہ لینے والے کارکنوں، ماؤں بہنوں اوربزرگوں کے کھانے پینے کے بندوبست میں بھی تعاون کریں۔