کراچی میں صفائی مہم شروع کرنے پر ایم کیوایم کے کارکنوں کو قائد تحریک الطاف حسین کا زبردست خراج تحسین

لندن ۔۔۔ 10 مارچ 2016ء

متحدہ قومی موومنٹ کے قائدجناب الطاف حسین نے کراچی میں صفائی مہم شروع کرنے پر ایم کیوایم کے کارکنوں کوزبردست خراج تحسین پیش کیا ہے۔ صفائی مہم کے آغازمیں ملیرمیں کارکنوں سے فون پر گفتگوکرتے ہوئے جناب الطاف حسین نے کہاکہ یہ شہرہماراہے اور شہر کوڑے کرکٹ اورکچرے سے صاف ہوگا توشہرکی فضاء صاف ہوگی،شہرجراثیم سے پاک ہوگااورشہری بیماریوں سے محفوظ رہیں گے۔ انہوں نے کہا کہ نبی آخرالزماں حضرت محمدمصطفےٰ ﷺ کی حدیث مبارکہ ہے کہ صفائی نصف ایمان ہے لہٰذاصفائی ستھرائی ہماری دینی فریضہ بھی ہے۔جناب الطاف حسین نے کہاکہ کراچی میں بلدیاتی انتخابات ہوئے تین ماہ ہوچکے ہیں کہ لیکن ابھی تک میئر کاالیکشن نہیں ہوسکا ہے اورشہرکوابھی تک بیوروکریسی کے ذریعے چلایاجارہاہے جس کی وجہ سے شہرمیں صفائی ستھرائی کی صورتحال بہت خراب ہے۔انہوں نے کہاکہ وزیراعلیٰ سندھ کوبھی اس پرتوجہ دینی چاہیے ، یہ شہران کابھی ہے،لہٰذا انہیں بھی چاہیے کہ شہرکی صفائی ستھرائی میں ایم کیوایم کے ساتھ تعاون کریں۔جناب الطاف حسین نے ایم کیوایم کے کارکنوں سے کہاکہ وہ غریب ومتوسط طبقہ کے علاقوں سے تعلق رکھتے ہوں،وہ اپنی اناکو ختم کرتے ہوئے مل جل کرصفائی مہم میں حصہ لیں۔