11مئی کو جو تاریخ رقم ہونے جارہی ہے وہ جاگیر دار ،وڈیرے اور سرمایہ داروں کے تابوت میں آخری کیل ثابت ہوگی ،ڈاکٹر فاروق ستار

کراچی:۔۔۔2، اپریل2013ء

متحدہ قومی موومنٹ کی رابطہ کمیٹی کے ڈپٹی کنوینر ڈاکٹر فاروق ستار نے کہا کہ ایم کیو ایم پہلی مرتبہ پورے ملک سے انتخابات میں بھر پور حصہ اس عزم ، ہمت و حوصلے کے ساتھ لے رہی ہے کہ پورے پاکستان میں انشاء اللہ ایم کیوایم کامیابی کے جھنڈے گاڑے گی۔یہ بات انہوں نے گزشتہ روز سابق حق پرست رکن سندھ اسمبلی عبد المعید صدیقی کے فنڈز سے نارتھ ناظم آباد میں تعمیر ہونے والی مختلف چورنگیوں کے افتتاح کے موقع پر شرکاء سے خطاب کرتے ہوئے کہی ۔ اس موقع پر ایم کیوایم نارتھ ناظم آباد سیکٹر کے ذمہ داران و کارکنان ریلی کی صورت میں سیکٹر آفس پہنچے تو ڈاکٹرفاروق ستار نے پرچم کشائی کرکے ایم کیو ایم کی جانب سے انتخابی مہم سال برائے 2013ء کا آغاز بھی کیا جس پرکارکنان خوشی کا اظہار کرتے ہوئے جئے الطاف اورجئے متحدہ کے فلک شگاف نعرے لگا تے رہے۔اس موقع پر سابق حق پرست ارکان اسمبلی اور کراچی تنظیمی کمیٹی کے ارکان بھی موجود تھے۔ڈاکٹر فاروق ستار نے کہا کہ متحدہ قومی موومنٹ آج اپنی انتخابی مہم کا با قاعدہ آغاز کررہی ہے اوراہلیانِ نارتھ ناظم آباد نے اس پروگرام کا انعقاد کر کے حق پرستوں کی کامیابی کی نوید دیدی ہے۔انہوں نے کہا کہ 1947ء میں گورے انگریزوں کا قبضہ ختم ہوا تھا اب انشاء اللہ تعالیٰ11 مئی کا دن کالے انگریزوں کے قبضے سے پاکستان کو چھٹکارہ دلانے کا دن ثابت ہوگا۔ انہوں نے کہا کہ قائد تحریک جنا ب الطاف حسین کے دئیے ہوئے منشور پر عمل درآمد سے کراچی سمیت پورے پاکستان میں امن و سکون قائم ہوگا،تعلیم ،صحت اور دیگر سہولیات کا نظام بہتر ہوگا،روزگار کے وسیع تر مواقع پیدا ہوں گے ،ہمارے نوجوانوں کو امریکہ ،کینیڈا، برطانیہ اور دیگر ممالک کے ویزوں کی ضرورت نہیں پڑے گی اور یہی قائد اعظم محمد علی جناح کا پاکستان ہوگا۔انہوں نے کہا کہ11مئی کو جو تاریخ رقم ہونے جارہی ہے وہ جاگیر داروں ،وڈیروں اور سرمایہ داروں کے تابوت میں آخری کیل ثابت ہوگی ۔