’’ قومی یکجہتی ریلی ‘‘ کا انعقادایم کیو ایم کا تین حصوں پر مشتمل ٹریفک پلان جاری

کراچی ۔۔۔۔18دسمبر2014ء

متحد ہ قومی موومنٹ کے زیر اہتمام سانحہ پشاور میں شہید ہونے والے معصوم طالبعلموں، اساتذہ کرام ، عملے کے ارکان ، سیکورٹی فورسز کے جوانوں اور دہشتگردی کی مختلف بزدلانہ کار روائیوں میں شہید ہونے والے پاکستانیوں کی یاد میں اور دہشتگردی کے خلاف جنگ میں انتہاء پسند و ں اور دہشتگردوں سے نبرد آزما پاک فوج ،رینجرز ،پولیس اور قانون نافذ کرنے والے دیگر اداروں کے جوانوں سے اظہار یکجہتی کیلئے19 دسمبر2014ء بروز جمعہ دوپہر 2بجے تبت سینٹر پر عظیم الشان’’ قومی یکجہتی ریلی ‘‘ کا انعقاد کیا جائے گا۔ ریلی میں ملک کے مختلف حصوں سے تعلق رکھنے والے طالبعلموں ، اساتذہ کرام، پروفیسرز ، لیکچرارز ، دانشوروں ، قلمکاروں ،لکھاریوں ، صحافیوں ، مختلف مکاتب فکر ، مسالک اور عقائد کے علما ء کرام ،فنکاروں ، اداکاروں ، شعبہ فن و ادب سے وابستہ شخصیا ت ،ایم کیوا یم کے مختلف، سیکٹرز ، یونٹس کے ذمہ داران ، کارکنان اور حق پرست عوام کی بڑی تعداد شرکت کرے گی۔ ریلی کے اختتام پر سانحہ 

پشاور اور دہشتگردی کے دیگر واقعات میں شہید ہونے والے پاکستانیوں کو خراج عقیدت پیش کرنے کیلئے قائد اعظم کے مزار سے متصل روڈ پر شمعیں روشن کی جائیں گی جبکہ اس موقع پر شہداء سانحہ پشاور کی غائبانہ نماز جنازہ بھی ادا کی جائے گی۔عظیم الشان ’’ قومی یکجہتی ریلی ‘‘ کے موقع پرایم کیو ایم کی جانب سے عوام کی سہولت کو مدنظر رکھتے ہوئے تین حصوں پر مشتمل ٹریفک پلان جاری کر دیا گیا ہے ، ایم کیو ایم کی جانب سے جاری کردہ ٹریفک پلان کے روٹ اے کے مطابق لانڈھی ، کورنگی ،ملیر ، شاہ فیصل ،ڈیفنس ، محمود آباد ، رنچھوڑ لائن سے آنیوالے عوام ریلی میں آنے کیلئے شاہراہ فیصل سے شاہراہ قائدین کے ذریعے تبت سینٹر آسکتے ہیں جبکہ ان علاقو ں سے آنے والے عوام کیلئے باغ جناح میں گاڑیوں کی پارکنگ کا انتظام کیا گیا ہے ۔ اسی طرح روٹ بی گلشن ، گلستان جوہر، اسکیم33گلشن معمار ، پیر الہٰی بخش کالونی PIBاور سوسائٹی کے علاقوں سے آنے والے عوام و کارکنان براستہ حسن اسکوائر ،اسلامیہ کالج سے پیپلزچورنگی کے ذریعے تبت سینٹر پہنچیں گے اور ان علاقوں سے آنے والے عوام کیلئے گاڑیوں کی پارکنگ کی سہولت بھی باغ جناح میں ہی فراہم کی گئی ہے علاوہ ازیں سرجانی ٹاؤن ، نیو کراچی ، نارتھ کراچی ، نارتھ ناظم آباد ، ناظم آباد گلبہار ، لیاقت آباد ، فیڈرل بی ایریا ، بلدیہ ٹاؤن ، قصبہ علیگڑھ ، اورنگی ٹاؤن اور پاک کالونی سے قومی یکجہتی ریلی میں شرکت کیلئے آنیوالے عوام لیاقت آباد سے تین ہٹی ، گرومندر سے نمائش چورنگی کے راستے تبت سینٹر آسکتے ہیں روٹ سی سے ریلی میں شرکت کیلئے آنے والے عوام کی پارکنگ کا انتظام کراچی ایکسرے کے سامنے کیاگیا ہے ۔ جبکہ اہم سیاسی و سماجی شخصیات اور میڈیانمائندگان پریڈی اسٹریٹ سے ایم اے جناح روڈ کے ذریعے تبت سینٹرسے ریلی میں شریک ہو سکیں گے اسی طرح میڈیا کی DSNGگاڑیاں اسٹیج کے عقبی جانب پارک کرنے کی سہولت فراہم کی گئی ہے ۔