مظلوم سندھی ایم کیوایم کے ممبر بن کر سندھ کے ہر گوٹھ، ضلع میں جناب الطاف حسین کا فکر و فلسفہ پہنچائیں، ارکان رابطہ کمیٹی

متحدہ قومی موومنٹ کی رابطہ کمیٹی کے ارکان سید حیدر عباس رضوی ، احمد سلیم صدیقی اور سید شاکر علی نے جھڈو میں قائم ایم کیو ایم کے رکنیت سازی مہم 2014ء کیمپ کا دورہ کیا ۔ اس موقع پر ایم کیوا یم رابطہ کمیٹی کے ارکان نے کیمپ پر رکنیت سازی کیلئے آنیوالے نوجوانوں ، خواتین او ر دیگر افراد کی ممبر سازی پرفارمے بھرنے میں رہنمائی کی اور انہیں ممبر سازی کی افادیت سے آگاہ کیا ۔ اس موقع پر ارکان رابطہ کمیٹی نے عوام سے گفتگو کرتے ہوئے کہا کہ ملک پر جاگیر داروں ، وڈیروں ، سرمایہ داروں کے قبضے نے پوری قوم کو پستی کی راہ پر گامزن کر رکھا ہے اور پاکستان دنیا کے ترقی یافتہ ممالک میں 67برس بعد بھی شامل نہیں ہو سکا ہے ۔ ارکان رابطہ کمیٹی نے کہا کہ وہ دن دور نہیں جب سندھ کے مظلوم و غریب عوام بھی ایم کیوا یم کے پرچم تلے متحد ہوکر صوبے کے وسائل پر قابض جاگیر داروں سے چھٹکارا حاصل کرلیں گے ۔ انہوں نے عوام سے اپیل کی کہ وہ بڑ ی تعداد میں ایم کیوا یم کے ممبر بن کر سندھ کے ہر گاؤں، گوٹھ ، ضلعے میں جناب الطاف حسین کا فکر و فلسفہ پہنچائیں تاکہ پاکستان میں غریبوں مظلوموں کی حکمرانی قائم کی جاسکے ۔