ایم کیوایم کے قائد الطاف حسین کی خصوصی ہدایت پر تھر کے قحط زدہ افراد کو طبی امداد اور اجناس کی فراہمی کیلئے ایم کیوایم کا وفد اتوار کی صبح نائن زیرو سے تھر روانہ

لندن ۔۔9نومبر 2014ء 

متحدہ قومی موومنٹ کے قائد جناب الطاف حسین کی خصوصی ہدایت پر تھر کے قحط زدہ افراد کو طبی امداد او رغذائی اجناس کی فراہمی کیلئے ایم کیوایم کے ڈپٹی کنوینر ڈاکٹر خالدمقبول صدیقی کی سربراہی میں ایک بڑا وفد اتوار کی صبح نائن زیرو سے تھر روانہ ہوگیا ۔وفد ایم کیوایم کے قائد جناب الطاف حسین کی رہائش گا ہ نائن زیرو عزیز آباد سے روانہ ہوا جس میں ایم کیوایم کی رابطہ کمیٹی کے ارکان سید شاکر علی ، محمد واسع جلیل،اشفاق منگی ، شعبہ اطلاعات کے ارکان، ایم کیوایم میڈیکل ایڈ کمیٹی کے ڈاکٹرزو پیرامیڈیکل اسٹاف ، خدمت خلق فاؤنڈیشن کے رضاکار، حق پرست ارکان اسمبلی اور سول سوسائٹی سے تعلق رکھنے والے افراد شامل ہیں جبکہ لمحہ بہ لمحہ کی صورتحال کی رپورٹنگ کیلئے الیکٹرونک وپرنٹ میڈیا سے تعلق رکھنے والے سینئر صحافی ،رپورٹر ز ،فوٹو گرافر،کیمرہ مین بھی وفد کے ہمراہ ہیں۔ دریں اثنا ء تھر کے قحط زدہ افراد کیلئے لاکھوں روپے مالیت کا سامان بھی روانہ کیا گیا جس میں روزمرہ کے استعمال کی اشیاء دالیں ،چینی،منرل واٹر ،چاول ،گھی ،تیل،چائے کی پتی ،دودھ، پیمپرز ، جانیں بچانیں کی قیمتی ا دویات ،روز مرہ کے استعمال کیلئے برتن اور دیگر ضروری سامان بھی شامل ہے ۔