ایم کیوایم کے قائد الطاف حسین کی ہمشیرہ کے گھرپر والدہ مرحومہ کی برسی پر رینجرز کی جانب سے قرآن خوانی کی اجازت نہ د ینا سراسرظلم ہے۔ ندیم نصرت

متحدہ قومی موومنٹ کے کنوینر ندیم نصرت نے ایم کیوایم کے قائدجناب الطاف حسین کی والدہ محترمہ خورشیدبیگم مرحومہ کی برسی کے موقع پران کی ہمشیرہ کے گھرپر رینجرز کی جانب سے قرآن خوانی کرنے کی اجازت نہ دینے کی شدیدمذمت کی ہے ۔ اپنے ایک بیان میں ندیم نصرت نے کہاکہ آج قائدتحریک الطاف حسین کی والدہ محترمہ خورشیدبیگم مرحومہ کی 32ویں برسی ہے ، اس سلسلے میں عزیزآبادمیں قائدتحریک کی بڑی ہمشیرہ محترمہ سائرہ خاتون کے گھرپر قرآن خوانی کی جانی تھی جس کے لئے ان کی رہائش گاہ کے باہر ٹینٹ لگایاجاناتھالیکن رینجرز کے افسران واہلکاروں نے وہاں قرآن خوانی کرنے کی اجازت دینے سے صاف انکارکردیااورکہاکہ اگرکسی نے قرآن خوانی کے لئے ٹینٹ لگائے تواسے بھی گرفتارکرلیاجائے گا۔ رینجرزاہلکاروں نے وہاں قرآن خوانی نہیں ہونے دی۔ صر ف یہی نہیں بلکہ محترمہ سائرہ خاتون کے گھرکے قریب اہل محلہ کی جانب سے جشن عید میلاد النبی ؐ کے سلسلے میں محفل میلادکاانعقاد ہونا تھا اور وہاں ٹینٹ لگایاگیا،رینجرزاہلکاروں نے وہ ٹینٹ بھی اکھاڑدیااورواضح اعلان کیاکہ علاقے میں قرآن خوانی ہویامحفل میلادکسی قسم کی کوئی بھی تقریب کرنے کی اجازت نہیں دی جائے گی۔ندیم نصرت نے اس عمل کی شدیدالفاظ میں مذمت کرتے ہوئے کہاکہ اسلام آبادمیں ایک مذہبی گروپ 23دن تک دھرنا دیے بیٹھارہا، جس نے نہ صرف وفاقی دارالحکومت کویرغمال بنائے رکھابلکہ پنجاب بھرمیں سرکاری ونجی املاک کوتباہ کیا،وزراء اورارکان پارلیمنٹ کے گھروں پر حملے کئے ، انہیں تشددکانشانہ بنایا، پولیس کے تھانوں، موبائلوں، بسوں، میڈیاکی وینوں اوردیگرگاڑیوں کونذرآتش کیا، کراچی میں بھی ان مذہبی شدت پسندعناصرنے شاہراہوں پردھرنے دیے اورپورے ملک میں دہشت گردی کابازارگرم کیالیکن ان کیلئے فوج کی قیادت حکومت کو افہام وتفہیم سے کام لینے کی تلقین کرتی ہے، آرمی چیف جنرل قمرباوجوہ وزیراعظم سے ملاقات کرکے دھرنادینے والے ان پرتشددمظاہرین سے نرمی سے پیش آنے کی کامشورہ دیتے ہیں اوریہ اعلان کیاجاتاہے کہ یہ اپنے لوگ ہیں اوراپنے لوگوں کے خلاف طاقت کااستعمال نہیں کرناچاہیے ۔فوج ایک ثالث کاکرداراداکرکے ان پرتشددمظاہرین سے معاہدہ کر اتی ہے اوراس شدت پسند مذہبی گروپ سے تعلق رکھنے والے جولوگ گرفتارکئے گئے تھے فوج کی مداخلت پر انہیں نہ صرف رہا کیا جاتاہے بلکہ فوج کی جانب سے ان لوگوں میں اعلانیہ پیسے تک تقسیم کئے جاتے ہیں جبکہ دوسری جانب کراچی میں قائدتحریک الطاف حسین کی ہمشیرہ کے گھرپر مرحومہ والدہ کے لئے قرآن خوانی کرنے اورمحلے والوں کو میلا د کرنے تک کی اجازت نہیں دی جارہی ہے ۔ ندیم نصرت نے کہاکہ صرف یہی نہیں بلکہ 9دسمبرکویوم شہداء منانے سے روکنے کی بھی کوششیں کی جارہی ہیں اوررابطہ کمیٹی کے ڈپٹی کنوینر بزرگ رہنماپروفیسرحسن ظفرعارف کوگرفتارکرنے اورغائب کرنے کی دھمکیاں دی جارہی ہیں۔ ندیم نصرت نے کہاکہ یہ سراسرظلم اوردہراطرزعمل نہیں ہے تو کیا ہے؟آخراس دہرے طرزعمل کے ذریعے مہاجروں کو کیا پیغام دیا جارہا ہے ؟ انہوں نے کہاکہ اس طرح کے ظالمانہ طرزعمل سے مہاجروں میں اچھے اورمثبت جذبات پیدانہیں ہوں گے۔ ندیم نصرت نے وزیراعظم شاہدخاقان عباسی اور چیف آف آرمی اسٹاف جنرل قمرجاویدباجوہ سے مطالبہ کیاکہ یہ ظلم بند کرایا جائے ، 9دسمبر کویوم شہداء کی راہ میں رکاوٹیں کھڑی نہ کی جائیں اورشہیدوں کے لواحقین، لاپتہ اوراسیرکارکنوں کے اہل خانہ اورہمدردوں کوشہداکی یاد گارپرجانے اوروہاں قرآن خوانی وفاتحہ خوانی سے نہ روکاجائے

۔ ندیم نصرت نے انسانی حقوق پر یقین رکھنے والے تمام حلقوں سے بھی اپیل کی کہ وہ اس ظلم کے خلاف آوازاحتجاج بلندکریں۔