متحدہ قومی موومنٹ کے کنوینرندیم نصرت کی واشنگٹن میں امریکہ کے بااثرکانگریس مین ٹیڈپو سے اہم ملاقات

متحدہ قومی موومنٹ ( پاکستان ) کے کنوینرندیم نصرت نے واشنگٹن میں امریکہ کے بااثرکانگریس مین ٹیڈپو( Ted Poe ) سے منگل کو اہم ملاقات کی ۔ ٹیڈپوکاتعلق حکمراں ری پبلکن پارٹی سے ہے ،وہ ریاست ٹیکساس سے منتخب ہوئے ہیں اورامریکی سیاست اوراقتدارکے ایوانوں میں نہایت اہم اوربااثر شخصیت کے طورپرپہچانے جاتے ہیں۔کانگریس مین ٹیڈپوسے ایم کیوایم کے کنوینرندیم نصرت کی یہ اہم اورتفصیلی ملاقات واشنگٹن کے کیپیٹل ہل میں ہوئی جس میں ایک اورسینئر کانگریس مین ڈینا رو رابیکر (Dana Rohrabacher) بھی موجود تھے ۔ تفصیلی ملاقات میں کنوینرندیم نصرت نے پاکستان میں پیراملٹری رینجرز اورسیکوریٹی فورسزکی جانب سے مہاجروں اوردیگرلسانی اکائیوں پر ڈھائے جانے والے ریاستی مظالم اورانسانی حقوق کی سنگین خلاف ورذیوں کے معاملے پر امریکی ایوان نمائندگان یعنی کانگریس میں آوازاٹھانے پر ایم کیوایم کے بانی وقائداوربابائے مہاجرقوم جناب الطاف حسین کی جانب سے کانگریس مین ٹیڈپو کادلی شکریہ اداکیا۔

کنوینر ندیم نصرت نے امریکی کانگریس مین کو کراچی اورسندھ کے شہری علاقوں میں ایم کیوایم کے خلاف جاری ریاستی آپریشن میں کارکنوں کے ماورائے عدالت قتل ، ڈیڑھ سو سے زائد کارکنوں کولاپتہ کئے جانے ،بڑے پیمانے پر کارکنوں کی گرفتاریوں ، سرکاری حراست میں کارکنوں پر انسانیت سوز تشدد، انہیں جھوٹے مقدمات میں ملوث کرنے، جیلوں میں اسیرکارکنوں کے ساتھ کئے جانے والے غیرانسانی سلوک،ایم کیوایم کے بانی وقائدجناب الطاف حسین کے اظہاررائے اورایم کیوایم کی سیاسی وفلاحی سرگرمیوں پر عائد غیرآئینی وغیرقانونی پابندی اورمظالم کی تفصیلات سے آگاہ کیا۔ کنوینر ندیم نصرت نے کانگریس مین ٹیڈپوکوبتایاکہ کس طرح آئی ایس آئی پیراملٹری رینجرز کے ذریعے ایم کیوایم کے کارکنوں کی سیاسی وفاداریاں تبدیل کرنے کیلئے مختلف ہتھکنڈے استعمال کررہی ہے اور ایم کیوایم کے کارکنوں کوگرفتارکرکے انہیں اپنی تشکیل کردہ پی ایس پی اورپی آئی بی ٹولے میں شامل ہونے پر مجبورکررہی ہے ، جوکارکن شامل ہونے سے انکارکرتاہے اس کورینجرز گرفتارکرکے لاپتہ کردیتی ہے،حراست میں تشدد کا نشانہ بناتی ہے اوربیدردی قتل کرکے اس کی لاش سڑکوں یاویرانوں میں پھینک دی جاتی ہے۔کانگریس مین ٹیڈپو نے مہاجروں پر ہونے والے ریاستی مظالم پر اپنی گہری تشویش کااظہارکیااوریقین دلایاکہ وہ ان مظالم کوبندکروانے کے لئے اپناہرممکن کرداراداکریں گے۔

واضح رہے کہ ایم کیوایم کے کنوینر ندیم نصرت ان دنوں امریکہ کے دورے پر ہیں۔اس سے قبل ان کی امریکہ کے انتہائی اہم اوربااثرکانگریس مین سینیٹر جان مکین، کانگریس مین ڈینا رو رابیکراوردیگرمختلف امریکی تھنک ٹینکس سے تعلق رکھنے والی کئی اہم امریکی شخصیات سے بھی ملاقاتیں ہوچکی ہیں۔ان ملاقاتوں میں وہ امریکی شخصیات کے سامنے مہاجروں کامقدمہ پیش کر چکے ہیں اورانہیں پاکستان میں مہاجروں کے خلاف جاری ریاستی آپریشن اورمختلف شعبوں میں مہاجروں کے ساتھ کئے جانے والے ظالمانہ سلوک کی تفصیلات سے آگاہ کر چکے ہیں۔ 

*****