ایم کیوایم رابطہ کمیٹی کے ارکان پروفیسرڈاکٹرحسن ظفرعارف، کنورخالدیونس اور امجداللہ خان کونقص امن کے تحت جیل میں قیدکرناسراسرظلم ہے۔ ندیم نصرت

متحدہ قومی موومنٹ کے کنوینر ندیم نصرت نے رابطہ کمیٹی کے ارکان پروفیسرڈاکٹرحسن ظفرعارف، کنورخالدیونس اور امجداللہ خان کونقص امن کے تحت ایک ماہ کیلئے جیل میں قیدکرنے کی شدیدالفاظ میں مذمت کی ہے ۔ اپنے ایک بیان میں انہوں نے کہاکہ کالعدم تنظیموں کے سربراہان کھلے عام اپنی سرگرمیاں انجام دے رہے ہیں ان سے حکومت اورریاستی اداروں کونقص امن کا کوئی خطرہ نہیں ہے، اسی طرح عمران خان اورپی ٹی آئی کے دیگررہنما دارالحکومت اسلام آباد کوبزورطاقت بندکرنے کے دھمکی آمیزاعلانات کررہے ہیں،حکومتی مشینری کوجام کرنے اورروکے جانے پر حکومت کوگرانے کی کھلی دھمکیاں دے رہے ہیں ، حکومتی وزراء بھی اس بات کابرملااظہارکررہے ہیں کہ عمران خان نے مسلح جہادی عناصرسے بھی رابطے کئے ہیں جس کی وجہ سے اسلام آباد میں حالات خراب ہونے کے خدشات ہیں لیکن وفاقی دارالحکومت کوبندکرنے اوراس کے حالات خراب کرنے کی دھمکیاں دینے والوں سے حکومت ، پولیس ،رینجرزاورریاستی اداروں کونقص امن کاکوئی خطرہ نہیں ہے لیکن ایم کیوایم کی رابطہ کمیٹی کے رکن 75سالہ سینئرپروفیسرڈاکٹرحسن ظفرعارف ،70سالہ کنورخالدیونس جوچار مرتبہ قومی اسمبلی کے رکن رہ چکے ہیں اورفالج کے مرض میں مبتلاہیں، اسی طرح امجد اللہ خان جوایک بزنس مین ہیں اوران لوگوں پر کسی قسم کاکوئی مقدمہ نہیں، جورابطہ کمیٹی کے ارکان کی حیثیت سے اپنی پرامن سیاسی سرگرمیاں انجام دے رہے تھے انہیں گرفتارکرکے نقص امن کے تحت ایک ماہ کیلئے جیل میں ڈال دیا گیا ہے جوسراسرظلم اورآمرانہ اقدام ہے جس کی جتنی بھی مذمت کی جائے کم ہے ۔ اسی طرح رابطہ کمیٹی کے رکن مومن خان مومن جوایک دانشورہیں اور ظفر راجپوت جوسندھ اسمبلی کے رکن رہ چکے ہیں انہیں بھی بلاجوازگرفتارکرکے مقدمات میں ملوث کیاجارہاہے ۔ ندیم نصرت نے کہاکہ ایم کیوایم کی رابطہ کمیٹی کے ارکان کی گرفتاریاں اورانہیں قیدوبندمیں رکھنے سے صاف ظاہرہے کہ ایم کیوایم کے خلاف آپریشن کرکے اسے ریاستی طاقت کے ذریعے کچلاجارہاہے ۔ ندیم نصرت نے مطالبہ کیاکہ رابطہ کمیٹی کے ارکان پروفیسرڈاکٹرحسن ظفرعارف، کنورخالدیونس اور امجداللہ خان،مومن خان مومن ،ظفر راجپوت اوردیگر تمام گرفتارشدگان کوفی الفوررہاکیاجائے ایم کیوایم کے خلاف ظالمانہ آپریشن بند کیاجائے ۔