متحدہ قومی موومنٹ کی رابطہ کمیٹی نے حیدرآبادکی زونل کمیٹی تحلیل کرکے 11رکنی ایڈہاک زونل کمیٹی تشکیل دیدی

حیدرآباد ۔۔۔ 21 اکتوبر 2016ء

متحدہ قومی موومنٹ کی رابطہ کمیٹی نے حیدرآبادکی زونل کمیٹی تحلیل کرکے حیدرآبادکے سینئرکارکنوں پر مشتمل ایک 11رکنی ایڈہاک زونل کمیٹی تشکیل دیدی ہے۔ قائدتحریک جناب الطاف حسین نے رابطہ کمیٹی کے اس فیصلے کی توثیق کردی ہے ۔ایڈہاک زونل کمیٹی کاانچارج سابق رکن سندھ اسمبلی اورایم کیوایم حیدرآبادزون کے سینئرکارکن ظفر راجپوت کومقررکیاگیا ہے جبکہ ایڈہاک کمیٹی کے دیگرارکان میں عامراقبال خانزادہ ، رشید بھیا، فہیم بیگ ، عابدغوری، جاوید خان، شجاعت ناغڑ، احسن وارثی، محترمہ رضوانہ ، ڈاکٹرفوزیہ اور محترمہ فرزانہ انصاری شامل ہیں۔ ایڈہاک زونل کمیٹی کااعلان آج حیدرآبادمیں ایک اجلاس میں کیا گیاجس میں کارکنوں کی بڑی تعدادنے شرکت کی ۔ ایڈہاک کمیٹی کااعلان رابطہ کمیٹی کے رکن مومن خان مومن نے کیا۔اجلاس میں شریک تمام کارکنوں نے زوردارتالیاں بجاکرایڈہاک زونل کمیٹی کے اعلان کازبردست خیرمقدم کیا ۔ اس موقع پررابطہ کمیٹی کے رکن مومن خان مومن نے اپنے خطاب میں کہاکہ ایم کیوایم دشمن قوتیں ہمیشہ سے یہ کوشش کرتی رہی ہیں کہ کسی طرح سے قائدتحریک الطاف حسین کوایم کیوایم سے الگ کردیاجائے ، انہیں اپنے کارکنوں اور مہاجرعوام سے دورکردیاجائے تاکہ مہاجروں کے حقوق کی اس جدوجہدکاخاتمہ ہوسکے اورپھرکوئی بھی مہاجروں کیلئے بولنے والانہ ہولیکن تمام تر سازشوں، پروپیگنڈوں اورمظالم کے باوجود قائدتحریک الطاف حسین اورایم کیوایم کے کارکنان ومہاجرعوام کارشتہ ختم نہیں کیاجاسکتا۔مومن خان مومن نے کہاکہ قائدتحریک الطاف حسین ایم کیوایم کے قائدتھے ،قائدہیں اوروہی ایم کیوایم اورمہاجروں کے قائدرہیں گے اورانہیں تحریک سے دورکرنے والے کبھی کامیاب نہیں ہوں گے۔ 

*****