سنڌ اسيمبلي جي ناقص سيڪيورٽي جو پول کولڻ جي ڏوھ ۾ اي آر وائي نيوز جي پروگرام “ سر عام ” جي ميزبان اقرار الحسن ۽ سرعام ٽيم جي ميمبرن جي گرفتاري تي ايم ڪيو ايم رابطا ڪميٽي جي طرفان مذمت جو اظهار
ڪراچي: 29 اپريل 2016
متحده قومي موومينٽ جي رابطا ڪميٽي سنڌ اسيمبلي جي ناقص سيڪيورٽي جو پول کولڻ جي ڏوھ ۾ اي آر وائي نيوز جي پروگرام“ سرعام ” جي ميزبان اقرار الحسن ۽ سرعام ٽيم جي گرفتاري جي سخت ترين لفظن ۾ مذمت ڪندي چيو آهي ته سرعام جي ٽيم سنڌ اسيمبلي جي ناقص سيڪيورٽي جو ڀانڍو ڀڃي ڪري هڪ سٺو قدم کنيو آهي. جنهن تي اقرار الحسن ۽ ٽيم جا ٻيا ميمبر خراج تحسين جي لائق آهن. رابطا ڪميٽي چيو ته اها ڳالھھ انتهائي افسوسناڪ آهي ته ناقص سيڪيورٽي ۽ اهلڪارن جي غفلت جي نشاندهي ڪرڻ تي اقرار الحسن ۽ سرعام جي ٽيم کي سنڌ حڪومت جي طرفان ساراهيو وڃڻ گهرجي ها. پر ابتڙ اقرار الحسن ۽ سرعام ٽيم جي ميمبرن سان جهڙي طرح جو رويو اختيار ڪيو ويو آهي. ان جي جيتري به مذمت ڪئي وڃي اها گهٽ آهي. رابطا ڪميٽي مطالبو ڪيو ته اقرار الحسن ۽ سرعام جي ٽيم جي ميمبرن کي فوري طور تي آزاد ڪيو وڃي ۽ انهن جي خلاف ڪاروائي ڪندڙن جي خلاف ڪاروائي ڪري سنڌ اسيمبلي ۽ ان جي سمورن ميمبرن کي تحفظ فراهم ڪيو وڃي.
*****