پیپلزپارٹی کی نسل پرست حکومت نے پکاقلعہ کے مکینوں پر چنگیزی مظالم ڈھائے ،الطاف حسین

لندن۔۔۔25، مئی2018ء

متحدہ قومی موومنٹ کے بانی وقائد جناب الطاف حسین نے سانحہ پکا قلعہ حیدرآبادکے شہداء کو زبردست خراج عقیدت پیش کرتے ہوئے کہاہے کہ ایم کیوایم، شہیدوں کی قربانیوں کو ہرگز رائیگاں نہیں جانے دے گی۔ سانحہ پکا قلعہ کے شہداء کی 28 ویں برسی کے موقع پراپنے ایک بیان میں جناب الطاف حسین نے کہاکہ 26/27 مئی 1990ء کو پیپلزپارٹی کی متعصب اورنسل پرست حکومت نے پکاقلعہ کے مکینوں پر یزیدی اور چنگیزی مظالم ڈھائے ،بے گناہ مہاجربزرگوں اورنوجوانوں کو خاک وخون میں نہلایا، آپریشن کی آڑ میں پکا قلعہ کے مکینوں کا پانی ، بجلی اور ٹیلی فون لائن منقطع کردی اور جب قرآن مجید سروں پر اٹھائے مہاجرخواتین نے یزیدی مظالم بند کرنے کی فریادیں کیں تو پولیس کی وردی میں پیپلزپارٹی کے بدنام زمانہ جرائم پیشہ دہشتگردوں نے ان پرامن مہاجرخواتین پر اندھادھند گولیاں برساکر انہیں شہید کردیا۔

جناب الطاف حسین نے کہاکہ پکاقلعہ کے بے گناہ شہیدوں کا لہوہرگز رائیگاں نہیں جائے گا اور بے گناہ مہاجروں کے قتل میں ملوث پیپلزپارٹی کے دہشت گردوں پر اللہ تعالیٰ کا عذاب نازل ہوگا۔ جناب الطاف حسین نے سانحہ پکا قلعہ کے شہداء کو زبردست خراج عقیدت پیش کرتے ہوئے دعا کی کہ اللہ تعالیٰ تمام شہداء کے درجات بلند فرمائے ، انہیں جنت الفردوس میں اعلیٰ مقام عطا کرے اور شہداء کے لواحقین کو صبرجمیل عطا فرمائے ۔ (آمین)