جناب الطاف حسین کا نجی ہوٹل میں آتشزدگی کے نتیجے میں ہلاکتوں اور درجنوں افراد کے زخمی ہونے پر انتہائی رنج اور افسوس کا اظہار

جناب الطاف حسین کا سوگوار لواحقین سے اظہار تعزیت اورزخمیوں کی جلد صحت یابی کیلئے دعا 

متحدہ قومی موومنٹ کے قائد جناب الطاف حسین نے کراچی کے ایک نجی ہوٹل میں آتشزدگی کے نتیجے میں ہلاکتوں اور درجنوں افراد کے زخمی ہونے پر انتہائی رنج اور افسوس کا اظہار کیا ہے۔ایک بیان میں جناب الطاف حسین نے کہا کہ دنیا کے بڑے شہروں میں آگ بجھانے کے جدید آلات ،کیمیکل اور دیگر حفاظتی اقدامات کے ذریعے آگ پر جلد قابو پاکر جانی نقصان سے بچا جاتا ہے لیکن بدقسمتی سے ملک کا سب سے بڑا شہر کراچی گزشتہ کئی سالوں سے عدم توجہی کے باعث بنیادی سہولتوں سے محروم ہے۔آگ بجھانے کے ناکافی آلات اور نامناسب حفاظتی اقدامات کی وجہ سے ہوٹل میں قیام پذیر افراد کی ہلاکتیں ہوئیں۔ جناب الطاف حسین نے وفاقی اور صوبائی حکومتوں سے مطالبہ کیا کہ فائر اینڈ ریسکو ڈیپارٹمنٹ کو ہنگامی طو ر پر فنڈز جاری کئے جائیں تاکہ فائر فائٹنگ کے جدید آلات اور گاڑیوں کی مدد سے کراچی کے شہریوں کی جان اور مال کے تحفظ کو یقینی بنایا جاسکے ۔ جناب الطاف حسین نے سوگوار لواحقین سے اظہار تعزیت کرتے ہوئے کہا کہ دکھ کی اس گھڑی میں ایم کیوایم کا ایک ایک کارکن آپ کے غم میں برابر کا شریک ہے۔ انہوں نے مرنے والوں کی مغفرت اور زخمیوں کی جلد صحت یابی کے لئے بھی دعا کی۔