انشاء اللہ ملک بھرمیں غریب ومتوسط طبقہ کی حکمرانی ضرور قائم ہوگی ، الطاف حسین

لندن۔۔۔26، جولائی 2016ء 

متحدہ قومی موومنٹ کے قائد جناب الطاف حسین نے کہاہے کہ تمام تر مصائب ومشکلات اور ریاستی مظالم کے باوجود ایم کیوایم ، ملک بھرکے غریب ومظلوم عوام کے بنیادی حقوق کیلئے جدوجہد جاری رکھے گی اور انشاء اللہ ملک بھرمیں غریب ومتوسط طبقہ کی حکمرانی ضرور قائم ہوگی ۔متحدہ قومی موومنٹ کے 19ویںیوم تاسیس کے موقع پر اپنے خصوسی بیان میں جناب الطاف حسین نے ایم کیوایم کے تمام کارکنان اور ملک بھر کے حق پرست عوام کو دلی مبارکباد پیش کرتے ہوئے کہا کہ 14، اگست1992ء کو مہاجرقومی موومنٹ کو متحدہ قومی موومنٹ میں تبدیل کرنے کا اعلان کیاگیا اورملک بھرکے مظلوم عوام کے حقوق کی آواز بلند کی گئی توایم کیوایم کی پرواز کو روکنے کیلئے 19جون 1992ء کو ایم کیوایم کے خلاف فوجی آپریشن شروع کردیا گیا، ایم کیوایم کے رہنماؤں اورکارکنوں پر بدترین مظالم ڈھائے گئے اورمہاجروں کے بنیادی انسانی حقوق پامال کئے گئے لیکن تمام تر ریاستی مظالم کے باوجود 26جولائی 1997ء کو مہاجر قومی موومنٹ کو متحدہ قومی موومنٹ میں تبدیل کردیا گیا ۔جناب الطاف حسین نے کہاکہ حق پرستانہ جدوجہد کی پاداش میں ایم کیوایم کے خلاف ریاستی مظالم کا سلسلہ آج بھی جاری ہے ، ایم کیوایم کے کارکنوں کو ماورائے عدالت قتل کیاجارہا ہے ، رہنماؤں ، منتخب نمائندوں ، ذمہ داروں اورکارکنوں کو گرفتارکرکے ان پر جھوٹے مقدمات قائم کیے جارہے ہیں ، گرفتارکارکنان کو جبری گمشدہ کیاجارہا ہے، ایم کیوایم کا میڈیا ٹرائل کیاجارہا ہے اور جبروتشدد کے ہتھکنڈے استعمال کرکے کارکنان کی سیاسی وفاداریاں تبدیل کرائی جارہی ہیں۔ جناب الطاف حسین نے کہاکہ تمام تر ریاستی مظالم اور مصائب ومشکلات کے باوجود ایم کیوایم ، ملک بھرکے غریب ومظلوم عوام کے بنیادی حقوق کیلئے جدوجہد جاری رکھے گی اورہمیں کامل یقین ہے کہ انشاء اللہ وہ دن جلد آئے گا جب ملک بھرسے فرسودہ جاگیردارانہ نظام کا خاتمہ ہوگا اور ملک پر غریب ومتوسط طبقہ کی حکمرانی ضرور قائم ہوگی۔جناب الطاف حسین نے حق پرست شہداء کو زبردست خراج عقیدت پیش کرتے ہوئے کہاکہ حق پرستی کی نظریہ کی بقاء کی خاطر اپنی جانوں کا نذرانہ پیش کرنے والے شہداء اور پرعزم اسیرساتھیوں کی قربانیاں کبھی رائیگاں نہیں جائیں گی ۔ جناب الطاف حسین نے ایم کیوایم کے رہنماؤں ، منتخب نمائندوں، ملک بھرکے تمام ذمہ داروں ، کارکنوں اور حق پرست عوام کو مخالفین کے منفی پروپیگنڈوں ، غیرقانونی چھاپوں گرفتاریوں اور ظلم وستم کے باوجود حق پرستی کے پرچم تلے متحد رہنے پر زبردست خراج تحسین بھی پیش کیا۔
Read in English