پبلک ٹرانسپورٹ میں کمی کے باوجود ٹریفک جام کے سبب شہریوں کی پریشانی پر رابطہ کمیٹی کا اظہار تشویش

کراچی۔۔۔11فروری2016ء

متحدہ قومی موومنٹ کی رابطہ کمیٹی نے کراچی میں پبلک ٹرانسپورٹ کی کمی اور شہر کی اہم شاہراہوں پر ٹریفک جام کے سبب شہریوں کو روز مرہ معمولا ت میں پیش آنیوالی پریشانیوں پر گہری تشویش کا اظہار کرتے ہوئے اسے سندھ حکومت کی کراچی دشمنی قرار دیاہے۔ایک بیان میں رابطہ کمیٹی نے کہاہے کہ سندھ حکومت کی جانب سے ملک کے سب سے بڑے شہر کو بنیادی سہولیات فراہم کرنے میں تنگ نظری اور تعصب کا مظاہرہ کیا جارہاہے، ایم کیوا یم گزشتہ کئی برسوں سے کراچی میں ماس ٹرانزٹ سسٹم کا مطالبہ کر تی آ رہی ہے لیکن سندھ حکومت کی جانب سے مسلسل تاخیری حربے استعمال کرکے عوامی فلاح کے منصوبوں کو سیاسی اختلافات کی بھینٹ چڑھا رہی ہے۔رابطہ کمیٹی نے کہاکہ کراچی ملک کا سب سے بڑا شہر ہے جہاں لاکھوں لوگ روزانہ پبلک ٹرانسپورٹ میں سفر کرتے ہیں لیکن آمد و رفت کی معیاری سہولیا ت نہ ہونے کے سبب شہریوں کو روزانہ شدید ذہنی اذیت اور پریشانی سے گزرنا پڑتاہے ۔رابطہ کمیٹی نے وزیر اعظم پاکستان میاں محمد نواز شریف سے مطالبہ کیا ہے کہ وہ کراچی میں عوامی پریشانی کو سمجھتے ہوئے ماس ٹرانزٹ سسٹم منصوبے کا فوری آغاز کروائیں اور شہریوں کی سہولت کیلئے معیاری پبلک ٹرانسپورٹ سسٹم متعارف کروائیں ۔