میئر، ڈپٹی میئرز اور ڈسٹرکٹ چیئرمین، وائس چیئرمین اور مخصوص نشستوں کے انتخابات ’’شو آف ہینڈ‘‘ کے ذریعے کرانے کے قانون کو کالعدم قرار دینے کے سندھ ہائیکورٹ کے فیصلے پر عوام کو ایم کیوایم کی مبارکباد

کراچی ۔۔۔ 10 فروری 2016 ء

متحدہ قومی موومنٹ کی رابطہ کمیٹی نے میئر،ڈپٹی میئرزاورڈسٹرکٹ چیئرمین، وائس چیئرمین اورمخصوص نشستوں کے انتخابات ’’شوآف ہینڈ‘‘ کے ذریعے کرانے کے قانون کو کالعدم قراردینے کے سندھ ہائیکورٹ کے فیصلے کازبردست خیرمقدم کیاہے اوراس فیصلے پر سندھ کے عوام کومبارکباد پیش کی ہے ۔ اپنے بیان میں رابطہ کمیٹی نے کہاکہ پیپلزپارٹی کی صوبائی حکومت سندھ خصوصاً سندھ کے شہری علاقوں پرجبراً تسلط قائم کرنے کیلئے آئے دن نت نئے ہتھکنڈے اختیار کررہی ہے ۔سپریم کورٹ کے حکم پرپیپلزپارٹی کی سندھ حکومت نے بلدیاتی انتخابات تو کرادیئے ہیں لیکن وہ بلدیاتی انتخابات کے عمل کومکمل ہونے اور بلدیاتی اداروں کے وجودمیں آنے کی راہ میں رکاوٹیں کھڑی کررہی ہے۔میئر،ڈپٹی میئرزاورڈسٹرکٹ چیئرمین، وائس چیئرمین اورمخصوص نشستوں کے انتخابات ’’شوآف ہینڈ‘‘ کے ذریعے کرانے کا قانون بھی اسی سلسلے کی کڑی تھاجسے آج سندھ ہائیکورٹ نے کالعدم قراردیدیا۔رابطہ کمیٹی نے الیکشن کمیشن سے مطالبہ کیا کہ میئر،ڈپٹی میئرزاورڈسٹرکٹ چیئرمین، وائس چیئرمین اورمخصوص نشستوں کے انتخابات کا شیڈول فی الفورجاری کیاجائے تاکہ بلدیاتی ادارے مکمل ہوسکیں اورمنتخب نمائندے اپنے منصب پرفائزہوکرشہریوں کی بھرپورخدمت کرسکیں۔رابطہ کمیٹی نے سپریم کورٹ سے مطالبہ کیاکہ شوآف ہینڈکے قانون کی طرح سندھ حکومت نے بلدیاتی اداروں کوان کے اختیارات سے محروم کر نے کاجوقانون منظورکیاہے وہ قانون بھی کالعدم قراردیاجائے اورآئین کے مطابق بلدیاتی اداروں کوان کے تمام اختیارات دیے جائیں تاکہ بلدیاتی ادارے مؤثراندازمیں عوام کی خدمت کرسکیں۔