عوام اور ملازمین پی آئی اے کی نجکاری نہیں چاہتے تو نجکاری نہ کی جائے۔ الطاف حسین

لندن۔۔۔6فروری 2016ء

متحدہ قومی موومنٹ کے قائدجناب الطاف حسین نے وزیراعظم میاں نوازشریف سے کہاہے کہ وہ دھونس دھمکی کے ذریعہ پی آئی اے کا مسئلہ حل کرنے سے گریز کریں، اگر عوام پی آئی اے کی نجکاری نہیں چاہتے تو نجکاری نہ کی جائے۔ہفتہ کی شب کراچی، حیدرآباداور میرپورخاص میں ایم کیوایم کی جانب سے منائے جانے والے جشن فتح کے اجتماعات سے خطاب کرتے ہوئے انہوں نے کہاکہ اپنے حقوق اورمطالبات کے لئے پرامن احتجاج کرنے والے پی آئی اے کے ملازمین پرجس طرح گولیاں چلائی گئیں اورلاٹھی چارج کیاگیاوہ قابل مذمت ہے ۔انہوں فائرنگ سے پی آئی اے کے دوملازمین کے جاں بحق ہونے پر افسوس کااظہارکیا اورحکومت سے کہاکہ پی آئی اے کے غریب ملازمین کے خلاف طاقت کے استعمال سے گریز کیاجائے اوراگرپی آئی اے کے ملازمین نہیں چاہتے تواس ادارے کی نجکاری نہ کی جائے ۔