ایم کیوایم کے کارکن اسداقبال کے ماورائے عدالت قتل کی تحقیقات کرائی جائے۔ الطاف حسین

لندن ۔۔۔ 2 اکتوبر 2015ء

متحدہ قومی موومنٹ کے قائدجناب الطاف حسین نے ایم کیوایم اورنگی ٹاؤن سیکٹرکے کارکن اسداقبال کے ماورائے عدالت قتل کی شدیدمذمت کی ہے ۔ اپنے ایک بیان میں انہوں نے کہاکہ کراچی میں ٹارگٹڈآپریشن کے نام پر ایم کیوایم کے کارکنوں اورہمدردوں کوجس طرح گرفتارکرکے ماورائے عدالت قتل کیا جارہا ہے ، جس طرح انہیں گرفتارکرکے سرکاری حراست میں وحشیانہ تشددکانشانہ بنایاجارہاہے اورانہیں شہیدکرکے ان کی تشددزدہ لاشیں پھینکی جارہی ہیں یہ ظلم وبربریت کی بدترین مثال ہے۔ اس سے قبل بھی ایم کیوایم کے کئی کار کنوں کوگرفتارکرکے ماورائے عدالت قتل کیاگیااوراب ایم کیوایم کے کارکن اسد اقبال کوبھی اسی طرح رینجرزاہلکاروں نے 21جولائی 2015ء کوگرفتارکرکے ڈیڑھ ماہ تک تشددکانشانہ بنانے کے بعد ماورائے عدالت قتل کردیااوران کی لاش موچکوکے علاقے میں پھینک دی گئی۔ جناب الطاف حسین نے اسداقبال کے ماورائے عدالت قتل کی شدیدمذمت کرتے ہوئے وزیراعظم نوازشریف اورچیف آف آرمی اسٹاف جنرل راحیل شریف سے مطالبہ کیاکہ رینجرزاہلکاروں کے ہاتھوں ایم کیوایم کے کارکن اسداقبال کے ماورائے عدالت قتل کی تحقیقات کرائی جائے اوراس واقعہ میں ملوث اہلکاروں کے خلاف کارروائی کی جائے ۔ انہوں نے انسانی حقوق کی تنظیموں سے بھی اپیل کی کہ وہ ایم کیوایم کے کارکنوں کے ماورائے عدالت قتل کانوٹس لیں اوراس کے خلاف آوازبلندکریں۔ جناب الطاف حسین نے اسداقبال شہیدکے لواحقین سے دلی تعزیت کااظہارکرتے ہوئے کہاکہ مجھ سمیت ایم کیوایم کاایک ایک کارکن آپ کے غم میں برابرکاشریک ہے ۔ انہوں نے دعاکی کہ اللہ تعالیٰ اسداقبال شہیدکواپنی جوار رحمت میں جگہ دے اورشہیدکے لواحقین کوصبرجمیل عطاکرے۔